Oral qalasyndaǵy  kúrdeli jóndeýden ótken jastar stadıony Elordanyń 20  jyldyq merekesi qarsańynda saltanatty túrde ashylyp,  turǵyndardyń  ıgiligine  berildi.

Halyqaralyq standartqa saı salynǵan stadıonnyń  aýmaǵy 7900 sharshy metrdi quraıdy. Alańǵa jasandy gazon tóselip, jastar men jasóspirimderdiń fýtbol oınaýyna jaǵdaı jasalǵan. Al qys mezgilinde munda muz tóselip, kópshilik syrǵanaý men dopty hokeı oınaýǵa múmkindik beriledi. Ashyq  muz aıdynynda hokeıshiler   +10 gradýsta da emin-erkin jattyǵa  alady.

• Elbasy  halyqqa arnaǵan ár Joldaýynda  buqaralyq  sportpen  turaqty aınalysý ult densaýlyǵynyń ajyramas bóligi ekenin aıtyp keledi. Sporttyń ınfraqurylymyn damytý maqsatynda óńirimizde birqatar jumystar atqaryldy. Aıta ketsek, sońǵy eki jyldyń ishinde Oral qalasynda 50 aýla abattandyrylyp, 20 sport alańy salyndy. Byltyr Aqsaı qalasynda sport kesheni salynyp, turǵyndardyń ıgiligine berildi. Sondaı-aq osydan  úsh jyl buryn bul stadıonǵa kúrdeli jóndeý júrgizý týraly másele kóterilgen bolatyn.  «Qarashyǵanaq Petrolıým Opereıtıng b. v.» kompanıasynan bir mıllıardqa jýyq  qarjy bólinip, eki jylǵa jýyq kúrdeli jóndeý jumystary júrdi. Astana merekesiniń qarsańynda jastar stadıony oraldyqtardyń ıgiligine berilip otyr. Barshańyzdy Elordanyń 20 jyldyǵymen quttyqtaımyn, - dedi saltanatty sharaǵa arnaıy qatysqan oblys ákimi Altaı Kólginov.

Jıyn barysynda Batys Qazaqstan oblysy boıynsha tuńǵysh ret dopty hokeıden Qazaqstan Respýblıkasyna eńbegi sińgen jattyqtyrýshy ataǵy Vıtalıı Nemolochnyıǵa berildi. Al jastar stadıonyndaǵy ashyq muz aıdynynyń qurylys jumystaryn júrgizgen «Birlik» JSHS-nyń dırektory Amanjol Ismaǵululy jastar stadıonyna 10 kónkı men 10 dopty syıǵa tartty.